Yennayer yessefk ad yuɣal d unṣib !

 

Yennayer n useggas-a ifren Tibest i wakken a s-teqqel d taɛebbuṭ n wezgar. D leḥṣin n tmaziɣt yemmugren tasenṭit n useggas amaynut 2964.

Usan-d si yal tama n tmurt n Lezzayer. Reksen isirman n yizzayriyen deg yiwen useḍru n tafat. Mlalen-d Imaziɣen iqbayliyen, imẓabiyen, izennaten, d wiyiḍ ddaw tecḍat n ubeṛnus n lubeṛ acawi. Cnan izelwan, ẓḍan iḥulfan, sdukklen timussniwin renan gren-d yiwet n nnehta i irefden lebɣi n yizzayriyen ad walin, ass-a qbel azekka, tummast-nnsen a ttsburr tamurt akken ma tella, tutlayt-nnsen ad tazzel ɣef yilsawen, tanaṣlit-nnsen ad taɣ meṛṛa ulawen… ass-a qbel azekka !

D tirebbuyaɛ i d-neɣlen ɣef Tbessa, di tebḥatt n wexxam n yidles Mohamed Chebouki. Segsen inebgawen d wudmawen yettwassnen am umussnaw Mouloud Lounaouci, amsuddas ameqqran Kamel Hammadi, acennay Hamidou, amyaru Rachid Boudjedra, ameskar Mohamed Hazourli, udem n tenwalt yettwassnen Massa Bouhamed, d wiyaḍ.

Ahil d win yennulen ayen-din n wudmawen n usfugel : isaragen, ccna, tamedyezt, timsirin, tuffɣiwin, irmuden i lmend n imeẓyanen, mebla ma nettu Imensi n Yennayer ara d-yeḍrun iḍ n 11.

Nessaram, ssya ar aseggas d-iteddun a d-nawi awal ɣef Yennayer s yisem-is d ass unṣib deg uwatay n wussan iɣelnawen ideg Izzayriyen ad sɛeddin ass-agi yecban wagi gar iɛeggalen n twaculin-nnsen u ad ttuxellaṣen akken ttuxellaṣen izzayriyen ussan n lɛid, n Lmulud, n 1u Nwabir d 5 yulyu…