APS – Yessuffeɣ-d Useqqamu Unnig i Timmuzɣa uḍḍun d uzzig n tesɣunt « Tamaziɣt Tura » ɣef Mammeri

LDZAYER TAMANEƔT – Yessuffeɣ-d Useqqamu Unnig i Timmuzɣa, seg melmi kan, yiwen n wuḍḍun d uzzig n tesɣunt-nnes « Tamaziɣt Tura » d tajmilt i Mouloud Mammeri yernu tura akk s tmaziɣt.

Uḍḍun-a isagg fell-as umaru amatu n Useqqamu Unnig i Timmuzɣa, Si El Hachemi Assad, yernu yessemyuddes-it Said Chemakh, d aduktur deg tesnilest. Wa d uḍḍun wis 14 n tesɣunt n « Tamaziɣt Tura » yernu yessegrew-d aṭas n yimagraden ɣef Mouloud Mammeri (1917-1989), uran-ten yesdawanen, imura, imedyazen d yemdanen niḍen ur yettwassnen.

Uḍḍun-a yebḍa ɣef 6 n tsegwa ay yeqqnen ɣer tezrawt, tasuqqil, tajmilt, tadiwennit, tazwert d yeḍrisen yemgerraden.

S waya, tasga tamezwarut d tin aydeg llan yimagraden n tesleḍt tasnetlant yerzan timsal ayɣef yura Mammeri deg tṣekka-nnes am tugna n tmeṭṭut, timawit, azɣan, assegrew n tgemmi d tmussni taqburt.

Tasga tis snat llant deg-s 3 n tmekkas n tsuqqilin ɣer tmaziɣt n « Adraw » (Le banquet), « Iḍes n Wuɣdim » (Le sommeil du juste) d « Azgar » (La traversée), d idlisen n Mammeri ay d-yettwassuqqlen i lmend n wesfugel n umulli wis 100 n tlalit n umeskar-a yernu s ussuddes n Useqqamu yernu ddaw leɛnaya n uselway n tegduda, Abdelaziz Bouteflika deg useggas n 2017. Ddant-d daɣ tsuqqilin n yeḍrisen niḍen, wi d « Tazemmurt » d « Imiṣred » (Le zèbre).

Tajmilt, deg wuḍḍun-a, rran-as-tt i Dda Lmulud Amussnaw s yisefra d yeḍrisen ay d-uran kra n yimura d yimedyazen ay d-yefrurin d wid ur yettwassnen aṭas. Uḍḍun-a ddant-d deg-s daɣ tdiwenniyin d tezwar ay iga Mammeri i kra n yedlisen.